(មូស្គូ)៖ ក្រសួងការពារជាតិរុស្ស៉ី បានឱ្យដឹងនៅថ្ងៃព្រហស្បតិ៍នេះថា កងយន្តហោះទម្លាក់គ្រាប់បែករបស់រុស្ស៉ីនិងចិន បានបំពេញបេសកកម្មល្បាតរួមគ្នា នៅលើតំបន់ចុងបូព៌ារុស្ស៉ី ក្បែររដ្ឋ Alaska របស់សហរដ្ឋអាមេរិក។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃព្រហស្បតិ៍ ទី២៥ ខែកក្កដា ឆ្នាំ២០២៤។
ក្រសួងការពារជាតិរុស្ស៉ី បាននិយាយថា ក្រុមយន្តហោះទម្លាក់គ្រាប់បែករុស្ស៉ី Tu-96MS និងក្រុមយន្តហោះទម្លាក់គ្រាប់បែកចិន Xian H-6 បានរួមគ្នាធ្វើប្រតិបត្តិការល្បាតដែនអាកាស នៅលើសមុទ្រ Chukchi និង Bering និងភាគខាងជើងមហាសមុទ្រប៉ាស៉ីហ្វិក។ ទីក្រុងមូស្គូបានបន្តថា សកម្មភាពល្បាតនោះ ត្រូវបានអនុវត្តដោយស្របទៅតាមច្បាប់អន្តរជាតិ និងមិនបានបំពានដែនអាកាសរបស់ប្រទេសណាមួយឡើយ។ បើតាមរុស្ស៉ី នៅចំណុចមួយអំឡុងបេសកកម្មនោះ ក្រុមយន្តហោះទម្លាក់គ្រាបបែកនៃប្រទេសទាំងពីរ ក៏ត្រូវបានអមដំណើរដោយ កងយន្តហោះចម្បាំងរបស់បរទេស ផងដែរ។
សេចក្តីប្រកាសអំពីការហោះហើរល្បាតរួមគ្នារវាងចិននិងរុស្ស៉ីធ្វើឡើង បន្ទាប់ពីបញ្ជាការដ្ឋានការពារដែនអាកាសតំបន់អាមេរិកខាងជើង ហៅកាត់ NORAD ដែលជាបញ្ជាការដ្ឋានរួម រវាងសហរដ្ឋអាមេរិកនិងកាណាដា បាននិយាយថា កងយន្តហោះយោធាអាមេរិកនិងកាណាដា បានហោះស្ទាក់យន្តហោះទម្លាក់គ្រាប់បែករបស់រុស្ស៉ី២គ្រឿង និងរបស់ចិន២គ្រឿង នៅក្នុងដែនអាកាសអន្តរជាតិ ក្បែររដ្ឋ Alaska កាលពីថ្ងៃពុធសប្តាហ៍នេះ។ NORAD បានបន្តថា ក្រុមយន្តហោះទម្លាក់គ្រាប់បែករុស្ស៉ីនិងចិន បានបន្តស្ថិតនៅក្នុងដែនអាកាសអន្តរជាតិ ហើយមិនត្រូវបានមើលឃើញថាជា ការគំរាមកំហែងឡើយ។
គួរបញ្ជាក់ថា ចិននិងរុស្ស៉ីបានកាន់តែជិតស្និទ្ធនឹងគ្នា ក្នុងពេលប៉ុន្មានឆ្នាំមកនេះ ហើយបានធ្វើសមយុទ្ធយោធារួមគ្នា ជាប្រចាំ។ ជាពិសេសចាប់តាំងពីរុស្ស៉ី បានធ្វើសង្រ្គាមឈ្លានពាន លើអ៊ុយក្រែន កាលពីខែកុម្ភៈ ឆ្នាំ២០២២មក ទីក្រុងប៉េកាំងបានរឹតបន្តឹងចំណងទាក់ទងជាលំដាប់ ទាំងផ្នែកការទូត សេដ្ឋកិច្ច និងយោធា ជាមួយទីក្រុងមូស្គូ។ ប្រធានាធិបតីរុស្ស៉ី លោក វ៉្លាឌីមៀ ពូទីន បានទៅបំពេញទស្សនកិច្ចទៅចិន កាលពីខែឧសភា ក្នុងការធ្វើដំណើរចេញក្រៅប្រទេសជាលើកដំបូង ក្រោយបន្តជាប់ឆ្នោតជាមេដឹកនាំរុស្ស៉ី ហើយក្នុងខែកក្កដានេះ លោកក៏បានជួបប្រធានាធិបតីចិន លោក ស៉ី ជីនពីង ម្តងទៀតផងដែរ អំឡុងកិច្ចប្រជុំថ្នាក់តំបន់ នៅប្រទេសកាហ្សាក់ស្ថាន៕
.jp.jpg)
